core/freeform

Félagar í Björgunarsveitinni Oki í Borgarfirði brugðu sér bæjarleið á mánudaginn og sóttu þrjú ný tæki til leitar- og björgunarstarfa sem sveitin hefur fest kaup á. Þetta voru sexhjól, fjórhjól og Jet sky og eru tæki þessi öll keypt af Ellingsen. Áður hafði sveitin fengið nýjan slöngubát sem keyptur var af Vélasölunni. Að sögn Tryggva Sæmundssonar stjórnarmanns í Oki er sífellt þörf á endurnýjun í tækjaflota björgunarsveita og æskilegt ef þær geta endurnýjan tækin meðan endursöluverð gömlu tækjanna er viðunandi. „Við erum vel tækjum búin björgunarsveit og hvílum á gömlum merg, en félagar í Ok fögnuðu einmitt fimmtíu ára afmæli sveitarinnar fyrr á þessu ári. Starfið hjá okkur er bara býsna blómlegt og það er gleðilegt að segja frá því að við gátum keypt öll þessi nýju tæki án þess að þurfa að skuldbinda sveitina,“ segir Tryggvi. Meðal annars tækjabúnaðar er m.a. vörubíll, tveir vel búnir fjallabjörgunarbílar og tveir snjóbílar. Aðsetur Oks er í Þorsteinsbúð, húsi sveitarinnar í Reykholti.

thumbnail

Fréttaveita Vesturlands

Björgunarsveitin Ok endurnýjar í tækjaflotanum